მეორე სამეფო
პირველ
სავარსკვლავო სამეფოში,
ყველაფერი, ყოველთვის
სანახევროდ ლამაზია.
შენი თითები,
ანგელოზები არიან,
ხანგრძლივი სასიყვარულო
ღამის შემდეგ რომ
ძილს მიეცნენ.
შენი თვალების
ხმოვანება: ქარის
საფეხურებზე
ჩამორბენილი
თოვლი.
შენი თმა,
იმ თაიგულის ფერია,
ღმერთმა რომ
შეკრა.
მეორე
სავარსკვლავო სამეფოში,
მხოლოდ
შენ ხარ.
---------------------------------------------------------
მხოლოდ იმის გამო
მხოლოდ იმის გამო,
რომ ხალხს უყვარს შნი გონება,
სულაც არ ნიშნავს
იმას, რომ
სხეულიც უნდა
უყვარდეთ.
--------------------------------------------------------
განწირული
მოჩვენებასავით დავბორიალობ
ზესკნელის ფერდობზე,
მონადირებული ვარ
იმ სივრცის მიერ,
რომელსაც უშენოდ
ვიცხოვრებ.
ვეფხვო! ვეფხვო! მწველო მნათო,
ტყის უღრანში თვალთ რომ აკრთობ,
რა უკვდავმა ძალამ შეგქმნა,
შიშმომრევო - გამავ ფერთა?
რა ქვესკნელის, ან რა ზეცის, -
ვინ დაანთო შენში ცეცხლი?
ვინ გაბედა ზიდვა - რა ფრთამ?
ცეცხლი, ხელით ვინ მოგართვა?
ან ვინ იყო, რა მოხელე,
ვინც გიწნავდა გულის კედლებს?
და გულმა რომ იწყო ფეთქვა, -
არ შეშინდა? სულ არ შეკრთდა?
რა უროთი? რა სამჭედლომ
შეძლო - გონი გამოედნო?
ან ვინ გწრთობდა - ტერორს ცეცხლში,
სასიკვდილო წყვილი ეშვით?
ვარსკვლავთცვენა იყო როცა,
ცრემლი სდიდა როცა შორ ცას,
გაუღიმა პირმშოს თავის
და დაიწყო შექმნა - კრავის?
ვეფხვო! ვეფხვო! მწველო მნათო,
ტყის უღრანში თვალთ რომ აკრთობ,
რა უკვდავმა ძალამ შეგქმნა,
შიშმომრევო - გამავ ფერთა?